बिरगंज २३ बैशाख । चुरे तथा वनजङ्गल संरक्षण अभियानले भोलि वैशाख २४ गतेदेखि आन्दोलन गर्ने घोषणा
गरेको छ । नेपाल पत्रकार महासङ्घ, पर्सामा शनिवार पत्रकार सम्मेलन गर्दै चुरे तथा वनजङ्गल संरक्षण अभियानका संयोजक सुनील यादवले भोलि वैशाख २४ गते आइतवारदेखि वीरगंजमा चरणबद्ध आन्दोलन गर्ने जानकारी गराए ।
उनले भोलि २४ गते विरोध जुलूस, कोणसभा, पर्सि २५ गते वीउवासङ्घअगाडि, २६ गते वीरगंज महानगरपालिका कार्यालयअगाडि, २७ गते डिभिजन वन कार्यालय, पर्साअगाडि र २८ गते जिल्ला प्रशासन कार्यालय, पर्साअगाडि प्रदर्शन गर्ने बताए ।
संयोजक यादवले श्रीसिया नदीको प्रदूषण नियन्त्रण, सार्वजनिक जग्गा अतिक्रमण रोक्न र स्थानीयलाई रोजगारको व्यवस्थाको माग गर्दै पर्सा रबाराका प्रमुख जिल्ला अधिकारीमार्फत प्रधानमन्त्री पुष्पकमल दाहाल प्रचण्डलाई ज्ञापनपत्र बुझाए पनि माग पूरा नभएकोले आन्दोलनका कार्यक्रम घोषणा गरेको बताए ।
