वीरगञ्ज, पर्सा — वीरगञ्ज महानगरपालिका–१२ मुर्ली बगैँचामा सञ्चालित यूथ केयर फाउन्डेसन कानुनी प्रक्रिया पूरा नगरी सञ्चालन भइरहेको आरोप सार्वजनिक भएको छ। स्थानीय स्रोतहरूका अनुसार करिब तीन वर्षदेखि सञ्चालनमा रहेको उक्त संस्थाले आवश्यक अनुमति, दर्ता तथा सम्बन्धित निकायको स्वीकृतिबिना गतिविधि सञ्चालन गर्दै आएको पाइएको छ।
स्रोतका अनुसार संस्थाका सञ्चालक वीरगञ्ज महानगरपालिका–२ छपकैया निवासी प्रजवलराज सिंह विरुद्ध मुद्दा दर्ता भएको छ। मुद्दा दर्तापछि उनी सम्पर्कविहीन रहेको र प्रहरीले खोजतलास जारी राखे पनि हालसम्म पक्राउ गर्न नसकेको बताइएको छ। यद्यपि उनी वीरगञ्जमै लुकेर बसेको हुन सक्ने दाबी स्थानीय स्रोतहरूले गरेका छन्।
जिल्ला प्रशासन कार्यालय पर्साले विभिन्न समयमा संस्थाका सञ्चालकलाई आवश्यक कागजातसहित उपस्थित हुन निर्देशन दिएको भए पनि उक्त निर्देशनको पालना नभएको आरोप छ। प्रशासनको निर्देशन बेवास्ता गर्दै संस्थाले आफ्नो गतिविधि निरन्तर सञ्चालन गरिरहेको स्रोतको भनाइ छ।
यसैबीच, यूथ केयर फाउन्डेसनको केन्द्रीय कार्यालयले पनि मुर्ली बगैँचास्थित शाखा बन्द गर्न सूचना जारी गरेको बताइएको छ। केन्द्रीय कार्यालयका अनुसार वीरगञ्जस्थित शाखाले संस्थाको नाम र प्रतिष्ठाको दुरुपयोग गर्दै अवैध रूपमा सुधार केन्द्र सञ्चालन गरिरहेको छ। तर शाखा कार्यालयले उक्त निर्देशन कार्यान्वयन नगरी गतिविधि जारी राखेको आरोप लागेको छ।
हाल उक्त संस्थामा करिब ३० जना विद्यार्थी बसोबास तथा अध्ययनरत रहेको जानकारी प्राप्त भएको छ। यसले संस्थाको वैधानिकता, व्यवस्थापन तथा विद्यार्थीहरूको सुरक्षासम्बन्धी विषयमा समेत प्रश्न उठाएको स्थानीयवासीहरूको भनाइ छ।
स्थानीयवासीहरूले सम्बन्धित निकायहरू—जिल्ला प्रशासन कार्यालय पर्सा, वीरगञ्ज महानगरपालिका तथा अन्य नियमनकारी निकायहरूले तत्काल छानबिन गरी संस्थाको कानुनी हैसियतबारे स्पष्ट पार्नुपर्ने माग गरेका छन्। साथै, आवश्यक अनुमति तथा कानुनी प्रक्रिया पूरा नगरी संस्था सञ्चालन गरिएको पुष्टि भए कानुनबमोजिम कारबाही गर्नुपर्ने उनीहरूको माग छ।
यता, यस विषयमा जिल्ला प्रशासन कार्यालय पर्सा, वीरगञ्ज महानगरपालिका तथा संस्थाका सञ्चालक पक्षको आधिकारिक प्रतिक्रिया प्राप्त हुन सकेको छैन। स्थानीयवासीहरूले नियमनकारी निकायको मौनताप्रति चिन्ता व्यक्त गर्दै पारदर्शी छानबिन र आवश्यक कारबाहीको माग गरेका छन्।
