वीरगंज ४माघ । पार्टीको हित विपरित काम गरेको भन्दै जनता समाजवादी पार्टीले वीरगंज महानगरपालिका वडा नं. १ का वडा अध्यक्ष मनोज राउत कुर्मीलाई तीन दिन भित्र स्पष्टिकरण बुझाउन निर्देशन दिएको छ ।
राउत स्थानीय तहको निर्वाचनमा जनता समाजवादी पार्टी नेपालको तर्फबाट वीरगंज महानगरपालिका वडा नं. १ को वडा अध्यक्षको उम्मेदवार भई निर्वाचित भएका थिए ।
निर्वाचित भएदेखि नै उनी पार्टी हित विपरित पार्टी बाटै निर्वाचित महानगर प्रमुखको विरुद्धमा लागेको र पार्टीलाई कमजोर बनाउन भुमिका खेलेको भन्दै पार्टीको महानगर समितिले राउतलाई तीन दिन भित्र स्पष्टिकरण बुझाउन बिहीबार पत्र पठाएर निर्देशन दिएको हो ।
महानगर समितिले पार्टीको निर्णय र निर्देशन बेगर नै पार्टीलाई नै कमजोर पार्ने गरि नगर प्रमुखको विरुद्धमा विभिन्न स्थानमा पार्टीको नाम लिएर सहभागि हुनुलाई गम्भीर रुपमा लिएको पनि जनाएको छ ।
‘पार्टीको निर्णय र निर्देशन बेगर के कति कारणले पार्टीलाई नै कमजोर पार्ने गरी नगर प्रमुखको विरुद्धमा विभिन्न स्थानमा पार्टीको नाम लिएर सहभागि हुनुभएको हो ? त्यसबारेमा ३ (तीन) दिन भित्र स्पष्टिकरण पेश गर्न निर्देशन दिईएको छ,’ राउतलाई सोधिएको स्पष्टिकरण पत्रमा उल्लेख छ ।
पार्टीबाट निर्वाचित नगर प्रमुख राजेश मान सिंहको विरुद्दमा कार्यपालिका बैठक, सामाजिक सञ्जाल, विपक्षि र विरोधीहरु सँग मिलेर विभिन्न स्थानमा ज्ञापन तथा पत्रकार सम्मेलन लगाएतका गतिविधिमा सहभागि हुँदै आउनु पार्टीको हित विपरित भएको पनि पत्रमा उल्लेख छ ।
भू–माफीया, दलाल र विकास विरोधीहरुको विरुद्ध एकपछि अर्को कारवाही अगाडी बढाई जनभावना अनुरुप वीरगंजको समग्र विकासलाई केन्द्रमा राखेर “वैभव वीरगंज” बनाउन अहोरात्र खटिने आफ्नै पार्टीको नगर प्रमुख विरुद्धको गतिविधिमा संलग्न भएको सामाजिक सञ्जालमार्फत प्रष्टै देखिएको भन्दै स्पष्टिकरण सोध्न बाध्य भएको महानगर समितिले जनाएको छ ।
महानगर समितिका अध्यक्ष इश्वरचन्द्र यादवले पार्टीको तर्फबाट निर्वाचित वडा अध्यक्ष राउत पार्टी हित विपरितको काममा सक्रिय रहेको देखिएकाले तीन दिन भित्र स्पष्टिकरण बुझाउन पत्र पठाइएको बताउनुभयो ।
राउतलाई स्पष्टिकरण माग गरिएको पत्रको बोधार्थ पार्टीको मधेस प्रदेश समिति र केन्द्रीय समितिमा पनि पठाइएको महानगर अध्यक्ष यादवले जानकारी दिनुभयो ।
