काठमाडौँ– प्रमुख प्रतिपक्षी दल नेकपा एमालेको अडानका कारण करिब दुई सातादेखि ठप्प रहेको प्रतिनिधिसभा खुलाउने विषयमा सहमति जुटाउन शीर्ष नेताहरुबीच बैठक सुरु भएको हो । बैठक केहीबेर अगाडि सिंहदरबारस्थित सभामुख देवराज घिमिरेको कार्यकक्षमा सुरु भएको छ ।
सभामुख देवराज घिमिरेको पलहमा बसेको बैठकमा प्रधानमन्त्री पुष्पकमल दाहाल प्रचण्ड, कांग्रेस सभापति शेरबहादुर देउवा, प्रमुख प्रतिपक्षी दल एमाले अध्यक्ष केपी शर्मा ओली र तीनै पार्टीका प्रमुख सचेतकहरु सहभागी छन् ।
आजको बैठकमा सदन अवरोध हटाउने र संसदीय समितिको सभापतिको निर्वाचनबारे छलफल हुने बताइएको छ । सत्तापक्ष र प्रतिपक्षी दलहरुले संसदीय समितिको भागबण्डा यसअघि नै टुंगो लगाइसकेका छन् ।
सुन तस्करी प्रकरणमा छानबिन गर्न उच्च स्तरीय छानबिन समिति गठन गर्नुपर्ने मागसहित एमालेले साउन १० गतेदेखि संसद् अवरुद्ध पार्दै आइरहेको छ । यसअघि दुई पटक संसद् बैठक सूचना टाँस गरेर स्थगित गरिएकाे थियाे ।
प्रतिनिधिसभा सोमबार दिउँसो १ बजे बस्ने कार्यसूची रहेको छ ।
