वीरगञ्जथ । कोशी प्रदेशमा नेकपा एमालेको सरकार ढलेको छ ।
शुक्रबार कोशी प्रदेशसभामा मुख्यमन्त्री हिक्मतकुमार कार्कीले विश्वासको मत प्राप्त गर्न नसकेपछि सरकार ढलेको हो । विश्वासको मत प्राप्तका लागि भएको मतदानका क्रममा कार्कीको पक्षमा ४६ र विपक्षमा ४३ मत परेको थियो ।
९३ सदस्यीय प्रदेश सभामा बहुमतका लागि आवश्यक पर्ने ४७ मत प्राप्त गर्न नसकेपछि मुख्यमन्त्री कार्की पदमुक्त भएका हुन् । मतदानका क्रममा प्रदेशसभामा ८९ सांसद उपस्थीति थिए । प्रदेशसभाका कायम संख्याको बहुमत प्राप्त गर्न नसकेका कारण मुख्यमन्त्री कार्कीले विश्वासको मत प्राप्त गर्न नसकेको प्रदेशसभाका सभामुख बाबुराम गौतमले जानकारी दिए ।
प्रदेशसभामा एमालेका ४० र राप्रपाका ६ गरी ४६ प्रदेश सांसद मुख्यमन्त्री कार्कीको पक्षमा उभिएका थिए । कार्कीले विश्वासको मत नपाएपछि अब कोशीमा नयाँ सरकार गठनको प्रक्रिया सुरु भएको छ । अव कांग्रेस वा माओवादी केन्द्रको नेतृत्वमा सरकार बनाउने तयारी गरिएको छ ।
