पर्सा, ०१ आसाढ ।पर्सा जिल्लाको ग्रामिण क्षेत्रमा पर्ने प्रसौनीभाठा नाकाबाट हुँदै आएको तस्करीको लाइन बन्द हुनुको सट्टा झन तस्करहरूको संख्यामा बढोतरी भएको स्थानीयहरूले दुखेसो पोखेका छन । स्थानीयहरूले जानकारी दिए अनुसार नूनदेखी सुनसम्मको तस्करी प्रसौनी नाकाबाट हुने गरेको बताए ।
केही दिन अगाडी प्रसौनीभाठा नाकाको बिषयमा समाचार प्रकाशित हुनसाथ दुई दिन बन्द रहेको तस्करीको लाइन पुन: सुचारू गरिएको स्थानीयले पीडा पोखे । दिनभरी सुनशान देखिने प्रसौनी र अमरपट्टि नाका रातिको समयमा तस्करहरूको लस्करै लाग्ने गरेको, स्थानीय बताउछन । स्थानीय प्रहरी प्रशासन माथिल्लो निकायसम्मको जिम्मा लिए पश्चात् तस्करी कार्य फस्टाएको बताइन्छ । विभिन्न मिडिया लगायत यस दैनिक पत्रीकाले समाचार प्रकाशित गर्नसाथ बन्द रहेको तस्करीको लाइन जिल्ला प्रहरी कार्यालय पर्साको क्राइम शाखा अर्थात अपराध अनुसन्धान शाखाका कर्मचारीहरूको सहयोग र संरक्षणमा पुन: तस्करीको लाइन सुचारू भएको बताइएको हो ।
प्रसौनीभाठा र अमरपट्टि नाकाबाट दिनहु करोडौ बराबरको कपडा अबैध रूपले भन्सार छली गरि नेपाल भित्रयाउने गरेको रहस्य बाहिरिएको छ । राजकुमार नामक कपडा तस्कर लगायत ६ जनाको समुहमा कपडा तस्करी हुने गरेको प्रहरी श्रोत नै बताउछन । उनका अनुसार प्रसौनीभाठा र अमरपट्टि नाकाबाट भित्रिने करोडौको कपडा सहजै प्रहरी प्रशासनको सहयोग र संरक्षणमा बारा जिल्लाको जितपुरसम्म पुर्याउने कार्य हुँदै आएको छ । उक्त नाकाबाट कपडा, चल्ला, ब्रान, कवाड लगायत हड्डिको समेत निर्वाध तरिकाले कार्य हुने गरेको स्थानीय बताउछन ।
जिल्ला प्रहरी कार्यालय पर्साका प्रहरी प्रमुख प्रहरी उपरीक्षक गौतम मिश्रले सीमा नाका लगायत शान्ति सुरक्षामा कडाइ गर्न निर्देशन दिएपनी उहाकै अपराध अनुसन्धान शाखाका कर्मचारीहरूको मिलोमतोमा तस्करी हुने गरेको पाइन्छ । तसर्थ : यस बिषयमा माथिल्लो निकायको ध्यान जान अति अवाश्यक देखिन्छ ।
