वीरगंज २ जेठ । अहिले गर्मी बढ्दै गईरहेको आवस्था छ गर्मीको मौसममा बालबालिका विशेष रूपमा संवेदनशील हुन्छन् किनकि उनीहरूको शरीर तापक्रम सन्तुलन गर्न सक्षम हुँदैन।
यो बेला बालबालिकामा विभिन्न स्वास्थ्य समस्या देखिन्छ । गर्मी मौसममा बच्चालाई घमौरा र घाउ–खटिरा आउने, धेरै पसिना आएर चिसो लाग्ने, बढी गर्मीले एलर्जी हुने जस्ता समस्या देखा पर्न सक्छ । त्यसैले गर्मीमा बालबालिकाको हेरचाहमा विशेष ख्याल गर्नु पर्दछ ।
यस्तो बेला बालबालिकाका लागि वीरगन्जका वरिष्ठ नवजात शिशु तथा बाल रोग विशेषज्ञ डाक्टर अतिन्द्र मिश्राको केहि सुझावहरु :-
१. पर्याप्त पानी र तरल पदार्थ दिनुहोस्
बच्चाहरूलाई दिनभरि सानो सानो परिमाणमा पानी पिउन दिनुहोस्। नुन, चिनी र पानीको घोल (ORS) वा लस्सी, जुस, तरबूज जस्ता जलयुक्त फलफूल दिनुहोस्।
स्तनपान गरिरहेका बच्चालाई नियमित र बढी स्तनपान गराउनुहोस्।
२. गर्मीबाट जोगाउनुहोस्
दिउँसोको चर्को घाम (१०:३० बिहानदेखि ४ बजे सम्म) मा बच्चालाई घर बाहिर जान नदिनुहोस्। बच्चालाई टोपी, सनग्लास, र हल्का कपडा लगाइदिनुहोस्। सकेसम्म छायाँ वा हावायुक्त स्थानमा राख्नुहोस्।
३. हल्का र खुकुलो कपडा लगाउनुहोस्
सूती (cotton) कपडा प्रयोग गर्नुहोस् जसले पसिना सोस्न मद्दत गर्छ। कसिएको वा तातो कपडा नलगाउनुहोस्।
४. सन्तुलित र हल्का आहार दिनुहोस्
बच्चालाई फाइबरयुक्त फलफूल (तरबूज, काक्रो, खरबुजा) दिनुहोस्। तारेको, मसालेदार वा भारी खाना सीमित गर्नुहोस्।
५. नियमित स्नान गराउनुहोस्
बच्चालाई दिनमा कम्तीमा एकपटक चिसो पानीले नुहाउनुहोस् (अत्यधिक चिसो पानी होइन)। पसिना धेरै आएको खण्डमा दिनमा २ पटक नुहाउनु उपयुक्त हुन्छ।
६. गर्मीजन्य रोगको लक्षणहरूमा ध्यान दिनुहोस्
लक्षणहरू: बढी पसिना, उच्च ज्वरो, अत्यधिक तिर्खा, छालामा रातो डाबर, सुस्तता, झमक्क निन्द्रा, वाकवाकी आदि। यस्तो देखिएमा तुरुन्त चिकित्सकको सल्लाह लिनुहोस्।
७. घर भित्र शीतल वातावरण बनाउनुहोस्
फ्यान चलाउनुहोस् वा झ्याल ढोका खोल्ने व्यवस्था गर्नुहोस्।
बच्चालाई सुताउने कोठा हावायुक्त र छायाँ भएको हुनुपर्छ।
