वीरगञ्ज, २१ श्रावण। सनातन हिन्दू मोर्चाले नेपाल सरकार तथा सम्पूर्ण आम नागरिकलाई लक्षित गर्दै राष्ट्रिय एकता, धार्मिक तथा सांस्कृतिक संरक्षण, सुशासन, सामाजिक उत्तरदायित्व र समसामयिक राष्ट्रिय विषयहरू समेटिएको २१ बुँदे सन्देश सार्वजनिक गरेको छ।
मोर्चाले सार्वजनिक गरेको सन्देशमा नेपालको मौलिक पहिचानको संरक्षण, कानुनको प्रभावकारी कार्यान्वयन, सामाजिक सद्भावको प्रवर्द्धन तथा राष्ट्रिय हितका विविध विषयमा सरकार र नागरिक दुवैको जिम्मेवारी स्पष्ट रूपमा उल्लेख गरिएको छ।
मोर्चाका केन्द्रीय संयोजक सन्तोषानन्द महाराजले नेपाल भगवान् पशुपतिनाथको पावन भूमि भएकाले यसको धार्मिक, सांस्कृतिक तथा ऐतिहासिक पहिचानको संरक्षण सम्पूर्ण नेपालीको साझा दायित्व भएको बताउनुभयो। उहाँले नेपाल विविध जाति, भाषा, धर्म र संस्कृतिले सम्पन्न राष्ट्र भएकाले पारस्परिक सम्मान, सहिष्णुता र राष्ट्रिय एकताको भावना अझ सुदृढ बनाउन आवश्यक रहेको धारणा व्यक्त गर्नुभयो।
उहाँका अनुसार सार्वजनिक गरिएको २१ बुँदे सन्देशले राष्ट्रिय पहिचान, सामाजिक सद्भाव, सांस्कृतिक संरक्षण तथा राष्ट्रिय एकताका विषयमा व्यापक जनचेतना अभिवृद्धि गर्नुपर्ने आवश्यकता औँल्याएको छ। साथै नेपालमा बसोबास गर्ने सबै समुदायबीच आपसी सम्मान, समान अधिकार र कानुनको शासन सुनिश्चित गर्दै अपराधमा संलग्न जोसुकैलाई पनि कुनै पक्षपात नगरी कानुनबमोजिम कडा कारबाही गर्नुपर्नेमा विशेष जोड दिइएको छ।
मोर्चाले नेपाली भाषा, संस्कृति, मौलिक पहिचान र नेपालीपनको संरक्षण तथा प्रवर्द्धनका लागि प्रभावकारी सरकारी नीति ल्याउन आग्रह गरेको छ। परम्परागत ज्ञान र मूल्यलाई संरक्षण गर्ने उद्देश्यले गुरुकुल शिक्षाको विस्तार, विभिन्न स्थानमा गौसेवा केन्द्र स्थापना तथा “सानो परिवार, सुखी परिवार” अवधारणालाई व्यवहारिक रूपमा कार्यान्वयन गर्न सरकारसँग माग गरिएको छ।
त्यस्तै विद्यालय, कलेज तथा सार्वजनिक शैक्षिक संस्थाहरूमा राष्ट्रिय एकता, देशभक्ति, नैतिक शिक्षा, सामाजिक उत्तरदायित्व तथा संस्कारमूलक शिक्षालाई प्राथमिकता दिँदै विशेष कार्यक्रम सञ्चालन गर्नुपर्ने धारणा पनि सन्देशमा उल्लेख गरिएको छ।
मोर्चाले धर्म परिवर्तनसम्बन्धी प्रचलित कानुनको प्रभावकारी कार्यान्वयन, सार्वजनिक सेवामा पारदर्शी तथा योग्यतामा आधारित नियुक्ति प्रणाली लागू गर्नुपर्ने, धार्मिक स्थलहरूको मर्यादा कायम राख्न स्वच्छ, शान्त र व्यवस्थित वातावरण सुनिश्चित गर्नुपर्ने तथा भाषा, पोशाक, टीका, अनुहार वा बसोबासका आधारमा हुने सबै प्रकारका विभेद अन्त्य गर्न सरकारसँग आग्रह गरेको छ।
सन्देशमा गौहत्या, बलात्कार, हत्या तथा राष्ट्रविरुद्धका गम्भीर अपराधमा संलग्न व्यक्तिलाई कडा कानुनी सजायको व्यवस्था गर्नुपर्ने मागसमेत गरिएको छ। साथै विद्यार्थीहरूलाई आत्मरक्षा, विपद् व्यवस्थापन तथा जीवनोपयोगी सीपसम्बन्धी तालिम उपलब्ध गराएर सक्षम नागरिक निर्माणमा जोड दिनुपर्ने उल्लेख गरिएको छ।
तराई–मधेस क्षेत्रमा हिन्दू धर्मको संरक्षणका क्रममा भएका हत्या तथा हिंसात्मक घटनाहरूको निष्पक्ष छानबिन गरी दोषीलाई कानुनबमोजिम कारबाही गर्नुपर्ने माग मोर्चाले अघि सारेको छ। यस्ता घटनाबाट प्रभावित परिवारलाई न्याय दिलाउन र भविष्यमा यस्ता घटना दोहोरिन नदिन प्रभावकारी सुरक्षा व्यवस्था गर्नुपर्ने आवश्यकता पनि औँल्याइएको छ।
मोर्चाले विगतमा पीडित तथा शहीद परिवारसँग भएका वैधानिक सम्झौताहरू पूर्ण रूपमा कार्यान्वयन गर्न, गम्भीर घाइतेहरूको निःशुल्क उपचारको व्यवस्था गर्न तथा राज्यले आफ्ना प्रतिबद्धता इमानदारीपूर्वक पूरा गर्न सरकारलाई आग्रह गरेको छ।
त्यसैगरी नेपालको शासन व्यवस्था, राष्ट्रिय पहिचान तथा दीर्घकालीन राष्ट्रिय हितसँग सम्बन्धित विषयहरूमा संविधान र लोकतान्त्रिक प्रक्रियाअनुसार खुला राष्ट्रिय बहस सञ्चालन गर्नुपर्ने धारणा पनि सन्देशमा समेटिएको छ। यस्ता विषयमा सबै राजनीतिक दल, नागरिक समाज, धार्मिक अगुवा तथा आम नागरिकको सहभागितासहित व्यापक छलफल आवश्यक रहेको मोर्चाको भनाइ छ।
केन्द्रीय संयोजक सन्तोषानन्द महाराजले सार्वजनिक गरिएको २१ बुँदे सन्देशलाई सरकारले गम्भीरतापूर्वक अध्ययन गरी आवश्यक नीति तथा कार्यक्रममार्फत कार्यान्वयनतर्फ अग्रसर हुनुपर्ने बताउनुभयो। उहाँले सम्पूर्ण नेपाली नागरिकलाई राष्ट्रिय एकता, सामाजिक सद्भाव, धार्मिक सहिष्णुता तथा नेपालको धार्मिक–सांस्कृतिक सम्पदाको संरक्षणमा सक्रिय भूमिका निर्वाह गर्न पनि आह्वान गर्नुभयो।
मोर्चाले आफ्नो २१ बुँदे सन्देश कुनै एक समुदायको हितभन्दा माथि उठेर राष्ट्रिय पहिचान, सामाजिक उत्तरदायित्व, सांस्कृतिक संरक्षण र सुशासनका विषयमा बहस सिर्जना गर्ने उद्देश्यले सार्वजनिक गरिएको जनाएको छ।
